沪语悦读：淮海路个点心店
上海人讲个“淮海路”指个是淮海中路。四十多年前，搿一段个点心店勒路个南面有得马当、春江、江汉、泰山、人民、乔家栅等，路个北面有劳动、朝阳、光明邨、江夏等。还有勿少店，名为“食品厂”，实际浪向是卖点心个，屋里附近有“海燕”，是当时上海稀有个每日天夜里8点钟卖刚出炉个热面包。“哈尔滨”有得我欢喜个朗姆酒面包，过陕西南路个“上海”，以酥层牛肉合子闻名。迭些食品厂大多数是卖西点个，也有“高桥”，是卖本帮薄层多酥松香个高桥松饼个。
淮海路个点心店侪勿大，原来勒金光钟表店搭仔百花缝纫用品商店当中个江夏算是大个。店名原来叫“远东点心食府”。伊拉个“三鲜豆皮”，听上去像上海闲话个“头皮”。“三鲜豆皮”金黄颜色、像春卷，摆勒搪瓷盘里；搭春卷勿同个，是两头勿封馅头更加丰富，有得猪肉猪肚、猪心猪舌、鸡蛋、冬菇搭仔虾仁，再加猪油拌炒个糯米饭。包馅头个豆皮是绿豆搭仔大米浸泡之后磨粉摊饼，再铺一层鸡蛋糊。外脆内软，滋味鲜美。吃起来，再配一碗名为“八卦汤”个龟肉汤，捞到龟壳个倒是可以算一卦。
堂吃最小个店，是人民坊门口个人民餐厅，伊拉只卖排骨年糕。小店是长条状个，只有2米阔。进门收银台，到底灶头间；只好靠墙摆一排小台子。一块大排两根年糕，配甜面酱或者辣酱油，味道同样是鲜得来。
淮海路个点心店，蛮像阿拉上海人个，店面勿大勿魁梧，门面普通重实在，家家用心做特色。有自家个特色再好生存搭仔发展，勿管产品还是服务。想起当财贸记者个辰光，听到过一句商家总结：“人无我有，人有我精，人精我特。”
淮海路点心店获得部优个、有高桥松饼、老大昌奶油蛋糕等，获得市优个有光明邨香菇麻油蔬菜包搭仔三鲜小笼包。有口碑个更加多唻，比方乔家栅点心，淮海路门市部原来是勒26路朝海关方向个陕西南路站头边浪。冷天吃条头糕，里向是细沙、外头撒仔金黄桂花。热天介品尝豆沙馅个薄荷糕，绿粽叶衬白颜色个糕，看勒海也凉爽；名气最响个、是软糯爽口个擂沙圆，迭家创办于1909年（清宣统元年）个百年老店，京剧大师周信芳为伊个点心题赠“味传南国”。
小小点心也展现了上海人“螺蛳壳里做道场”个精、神、气，积极开动脑筋，用足资源，让生活更加美好；就像我小辰光勒长春食品店吃个甜点水果羹。水果用个是处理品，挖脱烂个搭仔碰坏脱个地方；切成功小块，加一眼形状像鸡头米、吃起来弹牙个大西米，摆藕粉着腻勾芡，吃起来热乎乎、甜蜜蜜个呀。
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问。